Қазақстан құрамасының көшбасшысы халықаралық турнирдің финалына шықты

Қазақстандық боксшы Сәкен Бибосынов Астанада «Елорда кубогы» халықаралық турнирінде екінші жекпе-жегін өткізді, деп хабарлайды Prosports.kz.

Оның бұл турнирдегі екінші қарсыласы таиландтық Танарат Сэнпхет болды. 51 келіге дейінгі салмақтағы жекпе-жек төрешілердің бірауыздан қабылдаған шешімімен (5:0) қазақстандық спортшының пайдасына аяқталды.

Үш раунд бойы Бибосынов бірінші нөмірде болып, екінші үшминуттықта қарсыласын нокдаунға түсірді.

Айта кетейік, Сәкен Бибосынов Ташкентте өткен әлем чемпионатындағы алғашқы жекпе-жегінде жеңіліп қалған болатын. Қазақстандық боксшы турнирге әлем чемпионы мәртебесімен барған.

Еске салайық, бүгін «Елорда кубогы» аясында бокстан Қазақстан ұлттық құрамасының екі көшбасшысы Махмұд Сабырхан мен Серік Теміржанов арасындағы жекпе-жек өтеді.