Мейірім Нұрсұлтанов: Титулдық жекпе-жекке жақындап қалдым
Жеңілмеген қазақстандық кәсіпқой боксшы Мейірім Нұрсұлтанов Prosports.kz тілшісіне берген сұхбатында Оңтүстік Кореядағы алдағы жекпе-жек және титул үшін күресу мүмкіндігі туралы айтты.
- Мейірім, Оңтүстік Кореядағы жекпе-жекке дайындық қалай жүріп жатыр? Қарсыласыңызды зерттеп үлгердіңіз бе?
- Жекпе-жекке дайындық жақсы жүріп жатыр. Қазір Алматыда жаттығып жатырмын. Қарсыласым жапон Сито Такесаки. Рекорды керемет: 15-0, оның 14-ін мерзімінен бұрын аяқтады. Панчер. Біз оның жекпе-жегін зерттеп жатырмыз.
- Көптеген әлемдік рейтингтерде сіз үздік 10-ға кіресіз. Өзіңізді титулдық жекпе-жекке жақынмын деп ойлайсыз ба?
- Құдайға шүкір, барлық рейтингтерге кіремін. Титулдық жекпе-жекке аз қалды. Әрине, бәрін уақыт көрсетеді. Биыл жыл соңында не келер жылдың басында титулға күресуге дайынмын.
- Сіз кәсіби мансабыңызды Америкада бастаған едіңіз. Бірақ соңғы уақытта Қазақстанда немесе Еуропа елдерінде жекпе-жек өткізіп жүрсіз. АҚШ-қа оралу жоспарда бар ма?
- Ия, әрине. Америкада шаршы алаңға шығуды жоспарлап отырмын, өйткені барлық ірі жекпе-жектер сол жерде өтеді.