«WBA Fedecaribe ме? Америкаға басқа белбеулер үшін келдім». Мұхаммед Әлидің залындағы қазақстандық – АҚШ-тағы өмірі, гонорар мен промоутерлер туралы

Өткен демалыс күндері Доминикана Республикасында жеңіліп көрмеген қазақстандық боксшы Николай Шваб (10-0, 6 КО) кәсіпқой бокстағы он бірінші жеңісіне қол жеткізді. Ол үшінші раундта венесуэлалық Эльбер Рохасты (18-7-2, 15 КО) техникалық нокаутпен жеңіп, жеңіл салмақтағы WBA Fedecaribe титулын қорғап қалды.

Аты аңызға айналған Мұхаммед Әли спортқа алғашқы қадамдарын жасаған Майамидегі 5th Street Gym спорт залында отандық боксшы Prosports.kz тілшісіне берген сұхбатында жуырдағы жеңісінен алған әсерін бөлісті, сонымен қатар АҚШ-тағы кәсіпқой карьерасы қалай дамып жатқаны туралы айтып берді.

– Николай, жекпе-жектен қандай әсер алдыңыз және күткеніңізге сай болды ма?

– Бұл жекпе-жек дәл біз жоспарлағандай өтті. Асыққан жоқпыз, қарсыласымызды шаршатып, корпустан көп соққы жасадық. Үшінші раундта ол шаршады, содан кейін мәселе шешілді. Бапкерлер де, мен де разымын.

- Эльбер Рохас бұрынғы қарсыластарыңызбен салыстырғанда ерекшеленді ме?

– Менің кәсіпқой карьерамдағы ең ұзын қарсылас болғанымен ерекшеленді. Біздің салмақ дәрежеміз үшін 176 см таңқаларлық. Сондықтан басына емес, ішіне көп соққы жасауды жөн көрдік.

– Сосуада WBA Fedecaribe белбеуін сәтті қорғадыңыз. Бұл титул Кариб аймағында қаншалықты бағалы?

- Жеке мен үшін оның құны жоқ, өйткені мен мұнда басқа белбеулер үшін ұшып келдім.

– Төрт жекпе-жектің үшеуін Доминикана Республикасында өткіздіңіз. Неліктен АҚШ-та емес?

– Мен АҚШ-та болған бір жыл ішінде рингке көп шығуға тырысамыз. Мен екі айда бір рет жұдырықтасамын және бұл уақыт маған қалпыма келіп, жаңа жекпе-жектерге дайындалу үшін жеткілікті. Доминикана Республикасында бізді шақыратын бокс шоулары өте жиі өтеді, егер жақсы қарсылас болса, біз бұл шақыруды ойланбастан қабылдаймыз.

- Сіз әлі Майамиде тұрып, Дино Спенсердің жетекшілігімен жаттығасыз ба, әлде бірдеңе өзгерді ме?

- Иә, мен 5-көшедегі аты аңызға айналған залда жаттығамын, біз Диномен төртінші жыл тамаша үйлесіммен жұмыс істеп жатырмыз және осы процестен ләззат аламыз. Әрине, шетелде бокспен айналысуға мүмкіндік берген қазақстандық бапкерім, ҚР еңбек сіңірген бапкері Қитаров Болат Аяпбергенұлымен үнемі байланыстамын. Сондай-ақ ол маған әрқашан рухани тұрғыда үлкен қолдау көрсетеді.

– Қазіргі уақытта промоутермен жағдай қалай? Сіздің америкалық менеджеріңіз Роберт Мазинс бұл туралы не дейді?

- Біз промоутерлердің ұсыныстарына ашықпыз, қазір біреуінің жауабын күтіп отырмыз. Жасыратыны жоқ, АҚШ-та ірі промоутермен келісімшарт жасасу үшін адамдар менің жекпе-жектеріме келіп, билеттер мен ақылы трансляцияларды сатып алатынына кепілдік болуы керек, мен медиа боксшы емеспін және жалпы алғанда Америкада танымал емеспін, бұл тұрғыда белгілі бір қиындықтар бар.

- Осы уақытқа дейін сіздің тек бір жекпе-жегіңіз BoxRec сайтында екі жұлдызды рейтингке ие болды. Оппозиция көтерілгенін қашан көреміз және ол неге байланысты?

- Жекпе-жектен сайын біз жақсы көрсеткіші бар қарсыластарды таңдаймыз, бұл бізге әлемдік рейтингте көтерілуге көмектеседі, сіз неғұрлым жоғары болсаңыз, соғұрлым қарсылас табу қиынға соғады. Статистикасындағы «нөлді» жоғалтып аламын деп қорқатындар көп. Жақында бізді өте қызық жекпе-жектер күтіп тұр деп ойлаймын.

- Америкада өмір сүру қиын, жекпе-жектерден түсетін гонорар бұл кезеңде оған жетпейтін шығар. Құпия болмаса, АҚШ-та қалай өмір сүріп жатсыз? 

- АҚШ-қа енді келгенімде, демеушілердің бірімен келісімшарт жасастық, ол баспана мен тамағыма жауап береді. Ал өмір сүруіме тек жекпе-жектердегі гонорар ғана бар. 

– АҚШ-тағы қазақстандық боксшыларды немесе спортшыларды көріп, араласып тұрасыз ба?

- Павлодралық боксшы Серік «Панда» Мұсаділовпен жақсы доспыз, тіпті отбасыларымызбен араласып тұрамыз. Жақын тұрмаймыз, бірақ бір-бірімізге қонаққа барамыз.

– Былтыр үш жекпе-жек өткіздіңіз. Биыл қанша кездесу жоспарлап отырсыз?

– Мамырда виза мерзімі аяқталады, тағы бір жекпе-жек өткізіп үлгеремін деп ойлаймын.

Фото: Николай Швабтың Инстаграм-парақшасы