IBF-тің назарына: Геннадий Головкин неміс емес, ҚАЗАҚ!

<p style="text-align: justify;"> <strong>Халықаралық бокс федерациясы (IBF) орта салмақта WBA (Super), IBO және WBC (Interim) тұжырымдарындағы әлем чемпионы, қазақстандық кәсіпқой боксшы Геннадий Головкинді өз рейтингінде неміс деп көрсетіпті.</strong></p> <p style="text-align: justify;"> Бұл туралы Bnews.kz сайты мәлім етті. IBF рейтингінде Геннадий Головкиннің тұсына Германия азаматы деп жазылыпты. Айта кету керек, Головкин 1982 жылы 8 сәуірде Қазақстан Республикасы Қарағанды қаласында дүниеге келген. 2006 жылы Германияға көшіп, кәсіпқой бокстағы карьерасын бастады.</p> <p style="text-align: justify;"> &laquo;Бүгінгі күні бокс әлемінде мега жұлдызға айналған отандасымыздың туып-өскен жерін анықтап жазбауы IBF федерациясының қызметкерлеріне үлкен сын. Кәсіпқой карьерасын Германияда бастағанымен Геннадий Қазақстандағы бокс мектебінің түлегі, мұны боксшының бокстасу стилінен анық аңғаруға болады. IBF-тің мұны да назарға алмағаны ондағы мамандардың сауатсыздығынан болуы мүмкін&raquo;, - дейді бокс саласындағы сарапшылар.</p> <p style="text-align: justify;"> Головкинді қазақстандық емес қазақ деуімізге дәлел де жоқ емес. ҚР Президенті Нұрсұлтан Назарбаевпен бір жиында бас қосқан боксшымыз: &laquo;Әкем &ndash; орыс, анам &ndash; кәріс, ал мен &ndash; қазақпын!&raquo; - деп жауап берген болатын.</p> <p style="text-align: justify;"> Айта кету керек, Головкин бүгінге дейін кәсіпқой бокста 33 жекпе-жек өткізіп, барлығында жеңіске жетті, 30 қарсыласын нокаутпен ұтты. Бұған қоса, қазақстандық боксшы үздіксіз нокауттар санын жиырмаға жеткізіп, әйгілі Майк Тайсонды жолда қалдырды.</p> <p style="text-align: justify;"> &nbsp;</p> <p style="text-align: justify;"> &nbsp;</p> <p style="text-align: justify;"> BNews.kz сайтынан</p>