Сәкен Бибосынов: Мырзағали Айтжанов екінші раундтан соң намысымды оятты

Қазақстандық боксшы Сәкен Бибосынов Prosports.kz сайтына ширек финал аясында өткен испаниялық Габриэль Эскобар Маскунаноға қарсы жекпе-жек туралы пікірін білдірді. 

- Жекпе-жек ауыр болды. Жүлдеге бір ғана қадам қалған еді. Сол үшін барымды салдым. Екінші раундта көп қателестім. Жеке бапкерім намысымды оятып, жақсы тактика қойып берді. Жоспарды орындап жеңіске жеттім.

- Қандай қателіктер жібердің?

- Қарсыласыма қарағанда бойында бойым ұзын болғандықтан ара-қашықтық сақтап жүруім керек еді. Алайда қарсыласымды жақын жіберіп қойдым. Алдыңғы қолмен көп жұмыс жасау керек болған. 

- Келесі қарсыласың туралы не айта аласың?

- Ағылшын боксшысымен спаррингтерде кездескенбіз. Бір-бірімді жақсы танимыз. Бар күшімді саламын.

- Нокдаун болғанда не ойладың?

- Соққым тигенін сездім. Бір жағынан қуандым. Қарсыласым лас жұдырықтасты. Көп ұстасып қалдық. Дегенмен көп нәрсе өзіңе байланысты ғой. Жақын жібермегенде бұлай болмас еді.

- Трибунадан Серік Сәпиевтің айқайлап айтқан кеңесін ести алдың ба?

- Серік Сәпиев тәрізді Олимпиада чемпионы қолдау көрсеткеніне қуаныштымын. Ол кісінің қолдауы күш-қуат береді. Сол чемпиондардың жолын жалғастырып, Олимпиадада Қазақстан әнұранын шырқатуға бар күшімізді саламыз.

Фото: Сали Сабиров, Қазақстан ҰОК