«Арландардың» жетінші кездесуіне шығатын құрамы белгілі болды

<p> <strong>&laquo;Astana Arlans&raquo; бүкіләлемдік бокс сериясының жетінші турын Алматы қаласында Италияның &laquo;Italia Thunder&raquo; клубына қарсы өткізеді. Бүгін қос ұжымның жекпе-жекке шығатын боксшылары белгілі болды.</strong></p> <p> Қазақстандық клуб осыған дейінгі алты кездесуін де жеңіспен аяқтады. &laquo;В&raquo; тобында көш бастап келеді. Ал &laquo;А&raquo; тобында Кубаның &laquo;Cuba Domadores&raquo; клубына тең қарсылас табылмай тұр.</p> <p> Марат Жақиев жаттықтыратын қазақстандық клуб жетінші кездесуін екі күннен кейін &laquo;Italia Thunder&raquo;клубына қарсы өткізеді. Италиялық ұжым да осал қарсылас емес. Топта үшінші орында келеді.</p> <p> Биыл бүкіләлемдік бокс сериясында 2016 жылғы Рио-де-Жанейрода өтетін Олимпиада ойындарының 17 жолдамасы сарапқа салынады. Осыған дейінгі өткізген кездесулер қорытындысы бойынша қазақстандық клуб сапынан үш боксшының жолдаманы иеленуге зор мүмкіндігі бар. Олар: Мейірім Нұрсұлтанов (75 келі), Василий Левит (91 келі) және Филип Хргович (+91 келі). Алғашқы екеуі қазақстандық боксшы болса, соңғысы клубтың хорватиялық легионері.</p> <p> Мейірім Нұрсұлтанов пен Василий Левитке Олимпиада жолдамасы аса маңызды. Сондықтан да боксшылар кездесулерде барын салып жұдырықтасып келеді. Бас бапкер &laquo;Italia Thunder&raquo; клубына қарсы да екеуін шығарғалы отыр. Алғашқысының қарсыласы Рафаэль Мунно болса, екіншісі Эндри Спахиумен жұдырықтасады.</p> <p> &nbsp;</p> <p> Массагет.кз сайтынан</p>