ITTF жастар жарысын өткізуге арналған жаңа құрылымын бекітті
Халықаралық үстел теннисі федерациясы (ITTF) WTT (Дүниежүзілік үстел теннисі) жастар жарыстарының жаңа құрылымын жариялады.
Қазақстан үстел теннисі федерациясы хабарлағандай, ол екі деңгейге бөлінеді: WTT Youth Contenders және WTT Youth Star Contenders және де олар WTT-тің қалған шараларымен интеграцияланатын болады. Бұл қабілетті ойыншылардың тәжірибелі спортшылармен бәсекеге түсуіне мүмкіндік беріп, бәсекеге қабілеттілікті арттыру мақсатында жасалады.
WTT жастар сериясына келесі жас категориялары кіреді: U11, U13, U15, U17 және U19. WTT сериясындағы жастар жарыстарына өтініш қабылдау 15 қарашаға дейін жүргізіледі. Мүдделі ұлттық бірлестіктер 2021 жылы бірнеше жарыстарды бастауы мүмкін.
Сонымен қатар, COVID-19 пандемиясының салдарынан 2021 жылдың алғашқы үш айында жастар сериясы бойынша жарыстар болмайды. Маусымның ашылуы сәуір айына жоспарланған. Тағы бір өзгеріс - аралас жұптағы матчтардың болмауы. Оларды бағдарламаға енгізу әр жағдайда COVID-19 жағдайына байланысты.