Министрлік итбегілік өнерді спорт түріне қосуды көздейді
Қазақстан Республикасының Мәдениет және спорт министрлігі тазы мен төбетті сақтап, санын арттыру мақсатында қоғамдық ұйымдармен бірлесе, итбегілік өнерін ресми спорт түрі ретінде растау бойынша жұмыс істеп жатыр, деп хабарлайды Prosports.kz сайты Gurk басылымына сілтеп.
Министрлік жыл соңына дейін кешенді жұмыс жүргізіп, аккредитация беру мәселесін шешуді жоспарлап отыр. Нəтижесінде жауапты федерация заңды түрде атқарушы органдармен бірлесе жұмыс істеуге мүмкіндік алады.
Сонымен қатар итбегілікті ресми спорт түрі ретінде растайтын құжат спорт мектептерінде арнайы бөлімше мен секциялар ашуға, жаттықтырушылар мен төрешілер даярлап, біліктілігін арттыруға, республика аумағында чемпионат жəне басқа да халықаралық бəсекелер ұйымдастыруға жол ашады.
17 қыркүйекте Мəдениет жəне спорт министрлігі Спорт жəне дене шынықтыру істері комитеті төрағасының міндетін атқарушы Серік Жарасбаев, мемлекеттік құрылым жəне қоғамдық ұйым басшыларының қатысуымен онлайн жиналыс өтті.
Басқосуда тараптар алдағы уақытта атқарылатын жұмыстар жайлы ой бөлісті. Серік Жарасбаев бүгінгі таңда тазы мен төбетті сақтап, олардың санын арттыру маңызды екенін жеткізді.
«Ұлттық спорт түрлерінің жанашырлары өңірлерде тазы мен төбет ұстап, ғасырлар бойы жалғасып келе жатқан дəстүрді сақтап отыр. Алайда басты проблема бүгінгі жағдайға сай келетін ресми деректердің жоқтығында. Министрлік аталған мәселе бойынша жұмысты бастап кетті. Арнайы ұйым федерацияны аккредиттеу бойынша құжаттарды жинап, итбегілікті спорт түрі ретінде мойындау жолында жұмыс бастады. Содан кейін ғана біз еліміз бойынша олардың санын біріздендіреміз. Сондай-ақ бұл жұмыс «Рухани жаңғыру» бағдарламасы аясында да жүргізіледі. Елбасы Нұрсұлтан Назарбаев айтқандай ұлттық кодты сақтамай, ішкі дүниеміз өспейді. Біз бұл жұмысты ұлттық спорт түрлерін жандандыру арқылы да жасай аламыз. Тағы бір айта кететін жайт, СҚО Ботай ауылында Виктор Зайберт бастаған ғалымдардың қазба жұмыстары кезінде жануарлардың, оның ішінде иттің де сүйектері табылған. Бұл ата-бабаларымыздың итті ықылым заманнан қолға үйреткенінің дәлелі», - деді Серік Жарасбаев.
Айта кетейік, «Тазы-төбет-бөрібасар» қоғамдық ұйымының ресми емес деректеріне сүйенсек, бүгінде елімізде 40 мыңнан астам тазы мен төбет бар.
Сондай-ақ Серік Жарасбаев жануарларға қатысты жауапкершілікті күшейтетін заң жобасының жасалып жатқанын айтты. Ол аталған құжаттың арқасында мемлекет жануарларға қатысты заңның күшін арттыратынын жеткізіп, аталған заң тек үй емес, дала жануарларына да қатысты болатынын нақтылады.
