Нұртас Әжбенов рингке сегіз жыл бойы шықпаған өзбекстандық боксшымен жұдырықтасады

MTK Kazakhstan менеджерлік компаниясы 23 тамыз күні Алматыда өтетін бокс кеші аясындағы тағы бір жекпе-жек туралы жариялады, деп хабарлайды Prosports.kz. 

Кәсіпқой рингте жеңіліп көрмеген қазақстандық боксшы Нұртас Әжбенов (9-0, 4 КО) 28 жастағы өзбекстандық Шавкат Халиловпен (7-2, 1 КО) жұдырықтасады.

Boxrec.com бокс статистикасы порталының мәліметінше, Халилов соңғы жекпе-жегін 2012 жылдың мамыр айында Ташкентте өткізген. Сол кездесуде Халилов өзінің отандасы Рустам Абдурасуловтан (7-1-2, 5 КО) жеңіліс тапқан.

Нұртас Әжбенов болса, соңғы рет биыл, 6 наурызда Дубайда (БАӘ) филиппиндік Джей-Ара Магбуды (18-5-2, 9 КО) нокаутқа түсірді.

Фото instagram.com/mtk_kazakhstan