Бек Нұрмағанбет кәсіпқой бокстағы дебюттік жекпе-жегі жайлы айтты
26 шілдеде Минскіде өткен кеште қазақстандық боксшы Бек Нұрмағанбет (1-0) Венгрия өкілі Тамаш Ласканы нокаутпен жеңді, деп жазады Prosports.kz.
Кәсіпқой бокстағы алғашқы жекпе-жегін сәтті өткізген Нұрмағанбет Prosports.kz сайтына сұхбат беріп, алдағы жоспарлары туралы айтты.
- Бек, кәсіпқой рингтегі алғашқы жекпе-жегіңіз мерзімінен бұрын аяқталды. Қарсыласыңыз туралы не айта аласыз?
- Иә, Құдайға шүкір, алғашқы жекпе-жек бірінші раундта аяқталды. Біз бұл кездесуге жақсы дайындалдық. Қарсыласым өте тәжірибелі боксшы. Кәсіпқой рингте 40 жекпе-жек өткізген, 19 жекпе-жекте жеңіске жеткен. Мансабымды осындай боксшыға қарсы бастау қауіпті болды. Бірақ жаттықтырушылар құрамы мені осы жекпе-жекке жақсы дайындады.
- Сіз және сіздің командаңыз жекпе-жектің нәтижесіне қанағаттанаа ма?
- Көңілімізден шығады. Жаттықтырушым мен промоутердің пікірінше, дебюттік жекпе-жекте жақсы өнер көрсеттім. Титулдық жекпе-жектер әлі алда. Рингке екінші рет қашан шығатыным әзірге белгісіз.
- Титулдық жекпе-жек қашан өтеді?
- Нақты уақытты айту қиын. Бірақ промоутердің айтуынша, титулдық жекпе-жек өткізетін күн алыс емес. Өйткені, әуесқой бокста менің рейтингтік ұпайларым жақсы. Осының арқасында белбеу үшін жекпе-жекке ертерек қол жеткізетін шығармыз.