Үстел теннисінен бапкерлер кеңесі індетке байланысты бірқатар шешім қабылдады

Қазақстан үстел теннисі федерациясының бапкерлер кеңесі COVID-19 індетіне байланысты онлайн отырыс өткізді деп хабарлайды Olympic.kz.

Жиын барысында бірқатар мәселелер талқыланды. Атап айтар болсақ, Олимпиада ойындары қарсаңында енгізілген допингке қарсы ережелер, карантин кезінде спортшылармен қашықтықтан жұмыс істеу, сондай-ақ, халықаралық турнирлерді өту мерзімін ауыстыруға қатысты шешімдер қабылданды.

Бапкерлер кеңесе келе, жас теннисшілер арасындағы «Оңтүстік астана», «Алтын күз» халықаралық турнирлерін, Қазақстан кубогы мен ардагерлер арасындағы ашық біріншілікті, командалық ашық чемпионат пен жастар арасындағы біріншілікті кейінге қалдыруды бірауыздан мақұлдады.