Дмитрий Баландин көлігінің айнасын ұрлаған күдікті 3 жылға сотталуы мүмкін
Алматыда прокурор Олимпиада чемпионы Дмитрий Баландиннің айнасын ұрлаған күдіктіні 3 жылға бас бостандығынан айыруды сұрады, деп хабарлайды ҚазАқпарат.
<span>Іс №2 Алмалы аудандық сотында қаралып жатыр. Күдікті Айдос Уәлиев ҚР ҚК 188-бабы бойынша жауап беріп жатыр. </span>
<span>Жәбірленушілер белгілі Олимпиада чемпионы Дмитрий Баландин мен Алматы тұрғыны Қуанов Рауанбек. Сотталушы екеуінің көлігінен айналарын ұрлап кеткен.</span>
<span>Еске салсақ, алдыңғы сот отырысында сотталушы жәбірленушілерге келтірілген материалдық шығынды толығымен өтеген болатын.</span>
<span> «Барлық дәлелдер заңды түрде жиналды. Күдікті Айдос Уәлиев ҚР ҚК-нің 188-бабы бойынша айыпты деп танып, 3 жылға бас бостандығынан айыруды сұраймын. Ол жазасын қауіптілігі орта дәрежедегі орында өтесін», - деді мемлекеттік айыптаушы - прокурор Арман Оразбақов. </span>
<span>Ал Айдос Уәлиев соңғы сөзінде жылап жіберді. </span>
<span>«Мен айыбымды мойындаймын. Қылмыс жасағаныма өкінемін. Мен түрмеде отырып намаз оқи бастадым, тәубама келдім. Маған соңғы рет мүмкіндік берулеріңізді сұраймын. Мен өзгеремін. Отбасын құрып, бала сүйгім келеді. Мені қамамаңыздар»,- деді сотталушы. </span>
<span>Еске сала кетейік, оқиға 1 сәуірде болған. Құрманғазы мен Байсейітова көшелерінің қиылысында Олимпиада чемпионы Дмитрий Баландиннің Toyota Land Cruiser көлігінің айнасын біреулер ұрлап кеткен болатын. </span>
<span>Осыдан бір жыл бұрын сол жерде көліктің айнасын ұрлағандар мәнерлеп сырғанаушы Денис Тенді пышақтап кеткен болатын.</span>