Астанада өтетін бокс кешінде қазақстандықтар кіммен жұдырықтасады

Қазақстанның танымал боксшылары Тәуелсіздік мерекесі күнінде Астанадағы бокс кешінде өздерінің кезекті жекпе-жектерін өткізеді.

Кештің алғашқы жекпе-жегінде бұған дейін ешкімнен жеңіліп көрмеген Абылайхан Құсайынов (тоғыз кездесудің тоғызында жеңіске жеткен) пен Максим Мороз (Украина) кездеседі. Мороз үшін бұл кәсіби бокстағы алғашқы айқас. 64 келі салмақ дәрежесіндегі жекпе-жек 6 раундтан (әрқайсысы 3 минуттан) тұрады. <br /><br />Екінші болып рингке Асхат Уәлиханов пен украиналық боксшы Ярослав Юров шығып, 66 келі салмақтағы жеңімпазды анықтайды. Қазақстандық боксшы үшін Юровқа қарсы жекпе-жек - профидегі алтыншы жұдырықтасу. Бұған дейін ол 5 рет айқасып, біреуінде ғана жеңіліп қалған. 25 жастағы Ярослав Юров кәсіпқой бокс алаңына екі рет шығып, екі кездесуін де жеңіспен аяқтаған. Бұл жекпе-жек те 3 минуттан тұратын 6 раундқа есептелген. <br /><br />62 келі салмақ дәрежесіндегі жұдырықтасу да қызықты болмақ. Онда отандасымыз Айдар Шәрібаевтың (7 жекпе-жек, 6 жеңіс, 1 жеңіліс) қарсыласы - 37 жастағы тәжірибелі боксшы Артем Айвазиди. Украиналық боксшы бұған дейін 25 кездесу өткізіп, оның 11-ін жеңіспен аяқтаған. <br /><br />Суперауыр салмақта «Дәулет» спорткешенінің рингіне еліміздің намысын қорғауға Руслан Мырсатаев (2008 жылғы Олимпиада ойындарының қатысушысы, Бүкіләлемдік бокс сериясында «Астана Арланс» құрамындағы жеңімпаз) шығады. Сегіз раундтан тұратын жекпе-жекте Мырсатаев (профи-рингтегі 5 кездесуін жеңіспен аяқтаған) кәсіби бокста екінші кездесуін өткізетін Павло Кроленкомен (Украина) жұдырықтасады. <br /><br />Ал 52 келі салмақ дәрежесінде WBC Asia чемпионы атағы үшін кештің басты кездесуі «Қазақ жауынгері» атанып кеткен Елшат Нығметоллаұлы (15 жекпе-жек, 15 жеңіс) мен жеңіліп көрмеген әзербайжандық боксшы Фарид Әлиев (5 жекпе-жек, 5 жеңіс) арасында өтеді. <br /><br />Еске сала кетейік, кәсіби бокс кеші Qazaq Promoutions промоутерлік компаниясының бастамасымен 16 желтоқсан күні «Дәулет» спорткешенінде өтеді.