Мадиғали Қарсыбеков: Олимпиадаға тыңғылықты дайындалдық

Шорт-тректен Қазақстан құрамасының бас бапкері Мадиғали Қарсыбеков Олимпиада ойындарына соңғы дайындығы туралы айтып берді. 

- Соңғы оқу-жаттығу жиыны қалай өтті? 

- Жапонияда тоғыз күнге жалғасқан оқу-жаттығу жиынын аяқтадық. Ондағы мақсат жергілікті уақыт белдеуіне бейімделу болды. Тыңғылықты дайындалдық. Сонда жүргенімізде эстафета сайысына лицензия алғанымызды білдік. Алғашқы сайыс ақпанның 10-на жоспарланған. Команда өзін жақсы сезінеді. 

- Эстафеталық сайысқа қатысатын қосымша екі спортшымыз қалай дайындалды? 

- Ерлер толық құрамда Голландияда дайындалды. Лицензиясы болғандар Жапонияда олимпиадалық базада жаттықты. Сосын Қазақстан ҰОК-тан эстафетаға қатысатынымызды білдік. Бірден екі спортшымызды Жапонияға шақырдық. Оларда дайындықтарын пысықтады. 

- Олимпиада қалашығы қалай екен? 

- Келе салып аккредитация алдық. Олимпиада қалашығында орналастық. Бәрі жоғары деңгейде. 

- Олимпиадалық форма туралы не айта аласыз? 

- Форма өте әдемі, киім жасаған компанияда әлемге әйгілі бренд. Бізге ұнады. 

Естеріңізге сала кетсек, қысқы Олимпиада ойындарында мына шорт-трекшілер ел намысын қорғайды: Нұрберген Жұмағазиев, Абзал Ажғәлиев, Денис Никиша, Еркебұлан Шамұханов, Мерсаид Жақсыбаев, Анастасия Крестова және Ионг А Ким.