Жәнібек Әлімханұлы: Кәсіпқой боксқа ауыспаймын

Қазақстандық боксшы Жәнібек Әлімханұлы 9 қыркүйек күні Астана қаласында ЕХРО көрмесі аясында жекпе-жек өткізеді. Оның қарсыласы - 33 жастағы бразилиялық Кармелито Де Жезус болмақ. Жәнібек алдағы жекпе-жегіне дайындығы жайлы Рrosports тілшсіне берген сұхбатында айтып өтті.

- Алдағы жекпе-жекке дайындық қызу жүріп жатыр. Бәрі ойдағыдай. Жұдырықтаспағаныма көп болды.

- Қарсыласыңызды зерттеп үлгердіңіз бе?

- Қарсыласым тәжірибелі боксшы. Соққысы жойқын. Аяқпен жақсы жұмыс істейді. Қорғанысы берік. Қарсыласымның ыңғайына қарай дайындалып жатырмын. Ұлттық құрамамен жаттығу жиындарында болдым. Біраз тәжірибе жинақтадым.

- Әуесқой мен кәсіпқой бокстың айырмашылығы қандай екен?

- Әзірге аса бір айырмашылығын байқамадым. Алда көре жатармыз.

- Қашан кәсіпқой боксқа толықтай ауысасыз?

- Әлі жоспарда жоқ. Болашақта екеуін бірге алып жүремін деп ойлаймын.

- Өз жанкүйерлеріңіздің алдында жұдырықтасасыз. Қобалжу бар ма?

- Өз еліңде, өз жеріңде жұдырықтасу әркез қиын. Қобалжып жүрмін. Бірақ бәрі ойдағыдай болады деп сенемін. Өйткені дайындығымыз жақсы.

- Қанат Ислам мен Брендон Кук арасындағы жекпе-жекке болжамыңыз?

- Қанат та, оның қарсыласы да жеңілістің ащы дәмін татпаған тәжірибелі боксшылар. Қанаттың дайындығы жақсы. Шаршы алаңда өзінің мықтылығын көрсетеді.

- Геннадий Головкин мен Сауль Альварес арасындағы кездесуде кім жеңіске жетеді деп ойлайсыз?

- Жекпе-жек қызық болғалы тұр. Әрине, Головкинге жанкүйерлік етемін. Жеңіс Генаға бұйырады.

- Әлемді шулатқан америкалық боксшы Флойд Мейвезер мен ережесіз жекпе-жек өкілі, UFC чемпионы Конор МакГрегор арасында кездесу ұйымдастыру дұрыс па?

- Мұны жекпе-жек деп айта алмаймын. Таза шоу болады. Жеңіс Мейвезерге бұйыратын шығар, бірақ МакГрегор аяғымен теуіп жіберуі де мүмкін. Кім біледі? (күлді)