Головкин мен Сондерс қашан жұдырықтасуы мүмкін?

Орта салмақта WBO тұжырымының чемпионы Билли Джо Сондерстің промоутері Фрэнк Уоррен өз клиентінің алдағы жоспарларымен бөлісті.

Уоррен Сондерсті Геннадий Головкин – Сауль Альварес жекпе-жегінің жеңімпазымен кездестіргісі келеді. Ол үшін Билли Джоға америкалық кіші Вилли Монроны жеңу керек. Қос кездесу де 16 қыркүйекте өтеді.

«Егер Билли Монроны ұтса, келесі кездесуі Головкин – Канело жекпе-жегінің жеңімпазына қарсы өтуі үшін барымызды саламыз. Егер Головкин жеңсе, бұл кездесуді желтоқсанда ұйымдастыра аламыз, ал егер Канело ұтса – келесі жылы», - деді Уоррен.

Естеріңізге сала кетсек, Головкинге орта салмақтағы барлық белбеуді біріктіру үшін Сондерске тиесілі WBO титулы жетіспей тұр. Қазір қазақстандық боксшыда WBA (Super), WBC, IBF және IBO белбеулері бар.