Рой Джонс: «Қазақ елі талантты боксшыларға бай»
Бүгін Алматының «Достық» спорт кешенінде танымал америкалық боксшы Рой Джонстың қатысуымен баспасөз-мәслихаты өтті.
47 жастағы боксшы Қазақстанның қонақжайлылығына және еліміздің таланты боксшыларына тәнтті екенін айтты.
- Қазақ елі таланты боксшыларға бай, - деп бастады Рой Джонс, - Бұған дәлел - Олимпиададағы нәтижелер. 25 жыл ішінде Қазақстан талай мықты боксшыларды тәрбиеледі. Ең атақтысы - Геннадий Головкин. «Трипл Джи» - суперчемпион, әлемдегі ең үздік боксшылардың бірі. Қазақстанда бірінші рет емеспін, бұл мемлекет маған қатты ұнайды. Әр келген сайын мені өте жылы қарсы алады. Жан-жақтан қонаққа шақырып, тамақтандырады. Қазақстан - өте әдемі мемлекет. Қазақ халқының қонақжайлылығына тәнтімін.
- Рой Джонс, кезінде орта салмақтың патшасы едіңіз. Сол кездегі Рой мен Головкин жұдырықтасса, кім жеңер еді?
- Бұл өте ауыр сұрақ (күлді). Иә, мен де кезінде орта салмақта көш бастағанмын. Кім жеңетінін білмеймін, бірақ бұл өте тартысты әрі қызық жекпе-жек болар еді.
- Жалпы, қазіргі таңда Головкинді ұта алатын боксшы бар ма?
- Өзбасым, Геннадийді ұта алатын боксшы жоқ деп ойлаймын. Головкин өзінің қарсыластарынан әлдеқайда мықты.
- Оның келесі қарсыласы Джейкобс жайлы не ойлайсыз?
- Джейкобс - жақсы боксшы. Техникасы да жоғары. Бірақ, Головкинді жеңе алмайды.
- Ал Сауль Альварес ше?
- Мексикалық жайлы не айтуға болады? Жекпе-жектен қашып жүргенін бәрі біледі. Бәлкім, Альварестің өзі жұдырықтасқысы келетін шығар. Бірақ оның командасы Саульдің жеңілетінін сезіп, Головкиннен қашып жүр.
- Өзіңіз бокспен қашан қош айтысасыз? Жасыңыз да келді...
- Әрине, бұрынғыдай күшім жоқ. Келесі жылы бокспен қош айтысатын шығармын. Не болса да, әлі де шапшаңмын (күлді).
- Хопкинс те сіз сияқты бокстан кетуге асықпайды. Бернард жайлы пікіріңіз қандай?
- Ол 51. Яғни, менен үлкен. Бірақ түріне қарасаңыздар 69-дағы шалға ұқсайды. Мен болсам оның қасында жас көрінемін (күлді).
- Қазақстанда бокс мектебін ашу жоспарыңыз жоқ па?
- Мен Қазақстанға ақша үшін келген жоқпын. Менің мақсатым - жергілікті боксшылармен тәжірибе алмасу. Оларды үйрету. Қазақстанда әуесқой бокс мықты, оны бәріміз білеміз. Бірақ кәсіпқой бокста қазақстандық боксшылар аз. Мен сол кемшілікті толтырғым келеді. Қазақстандық боксшыларға көмектесу үшін келдім.