Парагульгов футболға оралуы мүмкін

Қазақстан құрамасының бұрынғы жартылай қорғаушысы Магамед Парагульгов кәсіби футболға қайта оралуы мүмкін екенін айтты, деп хабарлайды Prosports.kz.

Қазір ол Алматыда жүр, бірақ ресми жарыстарға қатыспайды, тек әуесқой деңгейде ойнап тұрады. Оның айтуынша, мансабын жалғастыруға мүмкіндік болған, алайда ол жүзеге аспаған.

Парагульгов «Ордабасымен» оқу-жаттығу жиынына бару нұсқасы болғанын, бірақ дайындық деңгейі жеткіліксіз болғандықтан және отбасылық жағдайларға байланысты бармағанын жеткізді.

32 жастағы футболшы алдағы уақытта футболға қайта оралу мүмкіндігін қарастырып отыр. Оның сөзінше, қазір қазақстандық ойыншыларға чемпионатта өздерін көрсетуге мүмкіндік көбірек.

Мансабы барысында ол «Қайрат», «Ертіс», «Қайсар», «Ақжайық», «Атырау» клубтарында ойнаған. Сондай-ақ шетелде — Кипрдің «Эрмис» және Грузияның «Торпедо» (Кутаиси) командаларында өнер көрсеткен. 2018 жылы Қазақстан құрамасы сапында екі матч өткізген.