Үлкен месседж. Олимпиада чемпионы Елдос Сметов ғылымға көңіл бөлуге шақырды
Елдос Сметов химиядан Олимпиада чемпионы атанған астаналық Санжарға «Қызық Премия» табыстады, деп хабарлайды Prosports.kz.
2024 жылғы Қазақстанның үздік спортшысы білім мен ғылымның спорттан кем түспейтінін айтты. «Қызық Таймс» бағдарламасының жүргізушісі Марат Оралғазин Сметовтің бұл әрекетін үлкен месседж деп бағалап, білім мен ғылымды дамытуға деген ұмтылысты жоғары бағалау керегін атап өтті.
2023 жылы НЗМ-нің 12-сынып оқушысы Санжар Бисенәлі химиядан Швейцарияның Цюрих қаласында өткен 55-ші Халықаралық олимпиадада (IChO-2023) алтын медаль жеңіп алған. Сол кезде Қазақстан құрамасы екі күміс және бір қола медаль иеленген еді.
БАҚ-тың хабарлауынша, Бисенәлінің бұл жеңісі үшін алған сыйақысы - 1500 АЕК (5 миллион 175 мың теңге). Өз мектебінің сайты Бисенәлінің осы жетістігі үшін Калифорния технологиялық институтынан (CALTECH) грант алғанын жазды. Бұл оқу орнының түлектері мен профессорлары арасында 47 Нобель сыйлығының лауреаты бар.