«Қазақстандықтар өте мейірімді халық». Рори Хиггинс - Қостанайға келуі туралы
«Дерри Ситидің» бас бапкері Рори Хиггинс Prosports.kz тілшісіне берген эксклюзив сұхбатында «Тобылға» қарсы матч туралы пікір білдірді.
– Рори, матчқа қатысты ойыңызды айтыңызшы.
– Біз бар әлеуетімізді толық көрсете алмадық деп ойлаймын. Олар керемет гол соқты. Дегенмен, интрига әлі бар.
– «Тобыл» «Дерриден» қай жағынан басым болды?
– «Тобыл» өз алаңында ойнады, бірінші таймда оларда бірнеше қауіпті сәт болды. Бірақ ойынның екінші жартысында біз өзімізді жақсырақ көрсеттік. Келесі аптада жеңіске жету үшін қолымыздан келгеннің бәрін көрсетеміз.
– Стадион мен ондағы атмосфера туралы не ойлайсыз?
– Атмосфера шынымен керемет болды! Үйдегі қолдау қонақ командаға әрқашан ауыр қысым келтіреді. Қазақстандықтар өте мейірімді халық, бізге бұл жер өте ұнады. Келесі аптада кездескенше.
– Қарымта ойынға болжамыңызды бөліссеңіз.
– Жоғарыда айтып өткенімдей, өз алаңымыздағы қолдау плей-офф кезеңіне өтуімізге көмектеседі деп сенеміз. Соған қарамастан, бізді қиын ойын күтіп тұрғанын білеміз, бірақ біз өз күшімізге сенеміз.
– «Тобылға» қарсы матч алдында қорқыныш болды ма? Себебі қостанайлықтар швейцариялық «Базельді» турнирден ұшырып жіберді.
– Жоқ, бізде қорқыныш емес, тек құрмет болды.
Фото: Derry Journal