Серікжан Мужиков: Конференция лигасында әлсіз команда жоқ

Қостанайлық «Тобылдың» капитаны Серікжан Мужиков Prosports.kz тілшісіне берген сұхбатында УЕФА Конференция лигасы іріктеу кезеңінің жеребесі жайында ойын айтты.

- Жеребе нәтижесі жайында әсеріңізді айтсаңыз.

- Жеребе жақсы, бірақ жолымыз болды-болмады деп айтқым келмейді. Ойын алдында екі команданың да мүмкіндігі тең болады.

- Қарсылас ішкі чемпионаттың жаңа маусымын сәтсіз бастады, 13 матчта 4 қана жеңіс бар. Олар осындай нәтиже көрсете берсе, «Тобылға» пайдалы ма?

- Мұндай турнирлерде әлсіз команда болмайды. Бізге «Хонканың» өнеріне қарағанда өзіміздің ойынымыз маңыздырақ. 13 шілдеге дейін уақытымыз бар, сондықтан қарсыласты сараптап, дұрыстап дайындаламыз. Өз жанкүйерлерімізді қуантуға тырысамыз.

- «Тобыл» бірінші матчты өз алаңында өткізеді. Қазір сырт алаңдағы гол есептелмейтінін ескерсек, екі матчтық текетіресті қай алаңда бастау маңызды болмай қалды ма?

- Бұл жеребе, оған әсер ете алмаймыз. Сондықтан бізге өз алаңымызда бастаймыз ба, сырт алаңда ойнаймыз ба - маңызды емес.