WBA Головкинді титулын қорғауға міндеттеді

Дүниежүзілік бокс қауымдастығы (WBA) орта салмақтағы әлем чемпионы Геннадий Головкин мен осы дивизиондағы тұрақты әлем чемпионы кубалық Эрисланди Лара арасында жекпе-жек ұйымдастыруды бұйырды, деп жазады Prosports.kz.

Қос боксшыға келіссөз жүргізуге 15 күн уақыт берді, ол 8 ақпанда басталып, 23 ақпанда аяқталады.

«Бастапқыда Головкин IBF нұсқасы бойынша міндетті қарсыласымен кездеуі керек еді. Алайда қазақстандық бұл титулдан бас тартты, сол себепті WBA Лараға қарсы жекпе-жек тағайындау туралы шешім шығарды.

Головкин супер орта салмаққа өтіп, былтыр қыркүйекте Сауль Альвареспен кездесуге арнайы рұқсат алған. Аталған шешімде ол орта салмақтағы чемпиондық атағын Лараға қарсы жекпе-жекте қорғауы керек екені көрсетілген.

Регламент бойынша (C.11) чемпион атанған боксшы титулын 120 күн ішінде міндетті қарсыласына қарсы қорғауы керек. GGG белбеуді былтыр 9 сәуірде жеңіп алды, сондықтан қорғау мерзімі 2022 жылы 8 тамызда аяқталды.

Тараптар келісімге келе алмаса немесе келіссөзден бас тартқан жағдайда WBA гонорарды Головкинге 75%, Лараға 25% мөлшерінде бөлу арқылы жекпе-жекті саудаға қоюы мүмкін», – делінген WBA ресми мәлімдемесінде.