«Қазақстандық Моуриньо» «Тұранда» жұмысқа орналасты
«Тұран» футбол клубы басшылығының шешімімен интернетте «қазақстандық Моуриньо» деп танымал болған Ивадулла Мелдеханов мүмкіндігі шектеулі көрермендермен жұмыс бойынша лауазымға тағайындалды, деп жазады Prosports.kz клубтың инстаграмдағы парақшасына сілтеме жасап.
Ивадулла - Түркістан тұрғыны. Бала кезден Кентауда футболмен шұғылданған. Былтыр «Тұранның» «Түркістан Аренадағы» бірде-бір матчын жібермеді.
7 жыл бұрын футбол жанкүйері Ивадулла Мелдеханов матчтарда ерекше қолдауымен ел назарын өзін аударды. YouTube-та оның видеосы 600 мың қаралым жинап үлгерген. Стадионда «қазақстандық Моуриньо» өзін бас бапкер ретінде көріп, командалар мен ойыншыларға ақыл-кеңесін айтып, трибунадағы көрермендерді «қыздыра» түсетін.
«Тұран» футбол клубы Ивадулла жаңа қызметінде табыс тілеп, команданың дамуына өз үлесі қосатынына сенім білдіреді.
