«Қайрат» Конференция лигасында «Базельден» төрт гол жіберді

Алматылық «Қайрат» Конференция лигасы топтық кезеңінде алғашқы жеңілісіне ұшырады, деп хабарлайды Prosports.kz. 

Қазақстан чемпионы 2-турда швейцариялық «Базельге» қонаққа барған. Алаң иелері істі бірден қолына алып, үзіліске дейін үш гол тоғытты. 15-минутта Артур есеп ашса, 21 және 40-минутта Майкл Ланг дубль авторы атанды. 

Ал екінші таймның басында Дэн Ндойе есепті 4:0 қылды. 

Бірақ алматылықтар матчтан голсыз кетпеді. 66-минутта Канте есеп айырмасын қысқартса, екі минуттан соң Рикарду Алвеш пенальтиден гол соқты. Қорытынды есеп - 4:2, «Базель» турнир кестесінде көш басына шықты. 

«Қайрат» әзірше бір ұпаймен 3-орында тұр. 

Алматылық команда Конференция лигасындағы келесі матчын 21 қазанда өткізеді. «Қайрат» Әзербайжанның «Карабах» клубына қонаққа барады.