«Қайраттың» бұрынғы шабуылшысы «Қызылжарға» қайта оралды

Петропавлдық «Қызылжар» шабуылшы Момоду Сисейдің команда қатарына қайта қосылғанын хабарлады, деп жазады Prosports.kz.

Гамбиялық ойыншы өткен маусымда солтүстікқазақстандық клубта өнер көрсеткен. Ол кезде Премьер лигада 14 ойын өткізіп, 3 гол соққан еді. Ал биылғы маусымды павлодарлық «Ертіс» сапында бастап, 9 матчқа қатысты.

30 жастағы шабуылшы бұдан бөлек, «Уоллидан» (Гамбия), «Грассхоппер» (Швейцария), «Челси» (Англия), «Вестерл» (Бельгия), «Жилина» (Словакия), «Қайрат» (Алматы), «Маккаби» (Израиль), «Кеми Кингс» (Финляндия) командаларында доп тепті.