Премьер-лигадағы дебютімді күтіп жүрмін - Рауан Орынбасар
«Жетісу» ойыншысы, Қазақстан U-21 құрамасының капитаны Рауан Орынбасар Prosports.kz тілшісіне сұқбат берді.
- Рауан, «Жетісудің» Бірінші лигадағы көрсеткіші жаман емес, бірақ кейбір жеңілістер болмағанда одан да биік позицияға көтерілуге болатын еді...
- Алаңда неше түрлі болады. Бұл - футбол. Кейбір матчтарда жеңісті уыстан жіберіп алдық. Көшбасшылыққа шығуға жарақаттар себеп болды. Мықты футболшылар уақытша қатардан шығып қалған. Бірақ алда екінші айналым бар, әлі де жоғары көтерілеміз.
- «Ақжайыққа» қарсы матч алдында бапкер қандай талаптар қойып жатыр?
- Қазір қарқынды жаттығу. Ойын таяғанда бапкер нұсқауын бере жатар. Оралға тек жеңіс үшін барамыз.
- 21 жасқа дейінгі Қазақстан құрамасының капитанысың, «Жетісудің» екінші командасында тұрақты ойын көрсетіп жатсың, Огай неге сенім білдіріп басты командаға алмай жатыр?
- Бұл сұрақты бапкерлер штабына қою керек сияқты. Солар жақсы біледі. Ал мен болсам өз жұмысымды жалғастырам және дамуымды тоқтатпаймын. Расын айтсам, Премьер-лигадағы дебютімді асыға күтіп жүрмін.
- Қазір бас бапкер Александр Масколенконың қол астында жаттығу жасайсыңдар. Оның жаңашылдықтарымен U-21-дің ойын мәнері өзгерді ме?
- Алекстандр Масколенко - білікті бапкер. ЕУРО-2020 аясындағы іріктеуде екі матч ұттық. Соның өзі көрсеткіш емес пе?!
- Қайрат Нұрдаулетов сіз сияқты қорғаныс ойыншысы еді. Ұлттық құрамада сізге персоналды ақыл-кеңестерін бере ме?
- Нұрдаулетов тек менімен емес, барлық ойыншымен сөйлесіп, ақыл айтып, тәжірибесімен бөліседі. Арасында ойыннан кейін жеке сөйлесетініміз бар. Тактикалық, техникалық білімін аямайды. Психологиялық тұрғыда мықты қолдау көрсете алады.
- Астанада Еуропа біріншілігіне іріктеу болады. Осы турнир алдында өзіңді қалай қайрап жатсың, қай қырыңнан көзге түскің келеді?
- Жақсы ойынмен көзге түсуге тырысамын. Бірақ команданың жеңісі жеке амбициядан биік. Барша жанкүйерді қыркүйектің алтысы күні «Астана-Аренада» Испания құрамасына қарсы өтетін ойынға шақырамын.