«Ақтөбе» - «Стяуа». Румыния сынағы

<p style="text-align: justify;"> <strong>Ертең ел чемпионы &laquo;Ақтөбе&raquo; Қобыланды батыр атындағы стадионда Румынияның &laquo;Стяуа&raquo; командасын қабылдайды. Бұл Чемпиондар лигасының екінші іріктеу кезеңі аясындағы ойын, деп мәлімдейді футбол федерациясының ресми сайты.</strong></p> <p style="text-align: justify;"> &laquo;Стяуа&raquo; &mdash; Румынияның ең сәтті клубы. Мақаламызды осымен бастағанымыз дұрыс шығар. Кезінде &laquo;Стяуа&raquo; сапында әлемге аты мәшһүр болған Георге Хаджи, Дан Петреску, Георге Попеску, Ангел Йордэнеску сынды саңлақтар ойнаған. Сонымен қатар, &laquo;Стяуа&raquo; Еуропа чемпиондарының кубогын жеңіп алған Шығыс Еуропаның тұңғыш клубы. Бұл 1986 жыл болатын. Ал келесі жылы румыниялық команда Украинаның &laquo;Динамосын&raquo; тізе бүктіріп, УЕФА кубогын иеленген еді.</p> <p style="text-align: justify;"> Әлбетте, қазір клуб бұрынғыдай қарымды емес. Рас, құрамында шебер ойыншылар жетерлік. Бірақ сонда да &laquo;Стяуаны&raquo; қазір бұрынғы алпауыт команда дей алмайсыз. Соған қарамастан, ойыншылары да, жанкүйерлері де қазақстандықтарды қалпақпен қайырып аламыз деп жүр. Тіпті, сұхбаттарында да Қазақстан чемпионы бізге қол емес дегенді жиі айтуда.</p> <p style="text-align: justify;"> &laquo;Ақтөбе&raquo; жайлы айтар болсақ, жерлестеріміз бұл ойынға қызу дайындыққа кірісіп кеткен. Тіпті, ішкі біріншілікті екінші рөлге қойып та жүр. Мәселен, алдыңғы күні ел чемпионы түзде Павлодардың &laquo;Ертісімен&raquo; тең түсіп қалды. Дегенмен, бас бапкері Владимир Газаев қанша жерден қиын болса да, әр ойында жеңіске жетуіміз керек деп желпініп отыр.</p> <p style="text-align: justify;"> Бас жаттықтырушының бұл құлшынысы міндетті түрде өз жемісін береді деп үміттенеміз. Грузияның &laquo;Динамосымен&raquo; болған ойын секілді &laquo;Стяуаға&raquo; қарсы кездесуде де жерлестеріміз бар өнерін ортаға салып, жеңісті жұлып алады деп ойлаймыз.</p> <p style="text-align: justify;"> Сонымен, 30 шілде күні біріміз қалмай &laquo;Ақтөбеге&raquo; жанкүйер боламыз. Өйткені, егер осы қарсыласын жеңер болса, онда &laquo;Ақтөбе&raquo; кем дегенде Еуропа лигасының топтық кезеңінде өнер көрсетуге мүмкіндік алады. Астана уақытымен сағат 21:00-де басталатын ойынды тікелей эфирден KAZsport арнасы көрсетеді.</p>