«Арман» Еуразиялық лиганың жеңімпазы атанды

Шілденің аяғында Ресейдің Қорған қаласында жағажай футболынан Еуразиялық лиганың үшінші кезеңі аяқталды. Жарысқа павлодарлық «Арман» клубы қатысты. 

Қорғанда өткен алғашқы ойында «Арман» футболшылары алаң иелері «Звезды Динамо» командасымен жолығып, 5:3 есебімен жеңіске жетті. 

Әрі қарай «Арман» жеңіс жолын жалғастырып, Новосібір қаласының «Джокер» командасынан 6:4 есебімен басым түсті. Барнаулдың «Алтай Соккер» командасын да қарсылас көрмеді - 4:1. Соңғы ойында ТГК (Томск) ұжымын 6:3 есебімен ұтты. 

«Арман» командасы 35 ұпай жинап, турнир жеңімпазы атанды. Енді қазақстандық команда Новосібір қаласында өтетін Еуразиялық лиганың суперфиналына қатысады.