Карлос Фонсека: Қалада жарнама жапсырған кездерімде болды
«Ертіс» футбол клубының жетекші ойыншысы Карлос Фонсека Prosports.kz сайтына эксклюзивті сұхбат берді.
– Карлос, «Ертіс» қазіргі таңда үшінші орында келеді. Маусымның басын қалай бағалайсыз?
– Команда ішінде атмосфера жақсы, турнир кестесінде жоғары орындарда тұрмыз. Бірақ өз алаңымыздан гөрі сырт алаңда жақсы ойнаймыз.
– Өз өнеріңізге қандай баға берер едіңіз?
– Әзірге толық бабында емеспін. Алдағы уақытта бар өнерімді көрсетуге тырысамын.
– Команда еурокубоктарға қаншалықты дайын?
– Бізді әлі чемпионатта көп ойын күтіп тұр. Еурокубок жайлы ойлап жүрген жоқпыз. Бар ойымыз қазір премьер-лигада.
– Соңғы екі ойында «Қайраттан» жеңілмедіңіз, бұл жолы ел кубогында ұтылдыңыз. Не үшін?
– Футболда мұндай болады. «Қайрат» сынды командадан үнемі ұтылмау мүмкін емес. Себебі оларда жақсы ойыншылар көп.
– Бұл матчта сіз алаңнан қуылған болатынсыз...
– Эмоцияға берілдім. Жеңілгенді ұнатпаймын.
– Былтырғы маусымда 11 сары қағаз алған болатынсыз. Көп емес пе?
– Сары қағаздар көбінде төрешілермен сөйлескен үшін көрсетілді. Кейде керек емес жерде тәртіп бұздым. Жеңіліп жатқан сәтте эмоцияға беріліп кететінім бар.
– «Қайратқа» қарсы ойын алдында қашан соңғы рет алаңнан қуылдыңыз?
– Бұрын. Есімде жоқ.
– Португалияда Қазақстан туралы сұрағанда не деп жауап бересіз?
– Қазақстан туралы тек жылы сөздер ғана айтамын. Әрине, бұл елдің мәдениеті, тілі, дәстүрі басқа. Бірақ маған Қазақстан ұнайды. Жақында әпкем қонақта болды, енді анам келуі керек.
– Португалия мен Болгариядан кейін Қазақстанның климаты қиыншылық тұдырған шығар?
– Жоқ, Болгарияда да қар жауады. Әрине, Қазақстанда қыста өте суық, бірақ мен үйреніп кеттім.
– Димитровты Болгарияда ойнап жүргенен бері танисыз. Оның мінезі жайлы не айта аласыз?
– Димитар футболмен өмір сүреді. Ол үшін әр ойын - соңғы ойын. Бірақ футболдан тыс уақытта ол футболшылармен жақсы араласады.
– «Қайратпен» өткен ойынға көңілі толмаған сияқты...
– Әрине, бас бапкер ғана емес, барлық команда мүшелерінің ойынға көңілі толмады. Жеңілу кімге ұнайды дейсіз.
– Футбол болмаса немен айналасар едіңіз?
– Білмеймін, мүмкін <span>«</span>парковкада<span>»</span> жұмыс істер едім (күлді).
– Португалияның 2-3 лигасында өнер көрсеткенінде жұмыс істедіңіз бе?
– Иә, бес жылдай футбол ойнап, қосымша жұмыс істегенмін.
– Кім болып?
– Әртүрлі жұмыста еңбек еттім.
– Мысалы?
– Спорт дүкенінде жұмыс істедім, қалада жарнама жапсырдым.
– Футбол мен жұмысты бірге алу ауыр болған жоқ па?
– Жоқ.
– Португалияның 2-3 дивизионы туралы айтып берсеңіз...
– Мен ол кезде жас едім, біз үшінші дивизионнан екіншіге көтерілген болатынбыз. Жалпы екі лиганың аса айырмашылығы жоқ, тек физикалық тұрғыда қиналдық біраз.
– Былтыр Португалия ЕУРО-ны ұтқан кезде қатты қуанған шығарсыз?
– Иә, өте қатты қуандық. Тіпті көршілер тынышталмасаңдар полицейлерді шақырамыз деп қорқытты.
– Португалия тарихындағы ең мықты футболшы кім? Фигу, Эйсебио немесе Роналду?
– Мен үшін - Роналду. ЕУРО-ны ұтқаны үшін ғана емес, ол - өте әмбебап футболшы.