Бауыржан Байтана: Сидельниковтың туған күніне сыйлық жасай алмадық
Қазақстан премьер-лигасының бірінші турындағы «Қайрат» - «Ақтөбе» ойынынан кейін жартылай қорғаушы Бауыржан Байтана өз пікірімен бөлісті.
- Бүгінгі ойын жайлы айтып өтсең...
- Ең алдымен, оқу-жаттығу жиыны жақсы өтті. ҚПЛ-дың басты фаворитінің бірі «Қайратқа» қарсы ойнау оңайға соқпайды.
- «Ақтөбе» сенің мансабыңдағы жаңа команда. Командаға бейімделуің қалай өтті?
- «Ақтөбе» жақсы команда. Жақсы ойыншылар бар. Командаға бейімделдім деп айтуға болады.
- Ойынға қандай тактика қойылды? Жеңіске жету үшін бапкерден қандай тапсырма алдыңдар?
- Матчтың басында қарсыласты қыспаққа алуға тырыстық және ол қолымыздан келді деп ойлаймын. «Қайрат» әр ойында бірінші нөмірмен ойнап үйренген. Сондықтан бапкер бізге қарымта шабуылға көңіл беруді нұсқады.
- Осы турдағы басқа ойындардың нәтижесіне таңқалған жоқсың ба?
- Шынымды айтсам, әлі нәтижелерді білмеймін де.
- «Ордабасы» «Астананы» 3:0 есебімен және «Тобыл» «Атыраудан» дәл осы есеппен басым түсті. Турнир кестесінде жеңіске жеткен екі клуб көш бастап тұр.
- Иә, таңқалып тұрмын. Егер олар осындай есеппен жеңіске жетсе, онда олар жақсы дайындықпен келген болар. Дегенмен, бұл тек бірінші тұр. Сондықтан да, ерте шешім қабылдаудың қажеті жоқ деп ойлаймын.
- Бүгін, 8-ші наурыз, халықаралық әйелдер күні және әріптесіңіз Андрей Сидельниковтың туған күні. Бүгін оны құттықтадыңыздар ма?
- Иә, біз оны ойынның алдында құттықтадық. Бүгін оның туған күніне жеңіс сыйлай алмағанымыз өкінішті. Келесі турда жеңіске жетсек, оған сыйлық болары анық.