Ронда Роузи – қатігез қылмыскер
Жеңіл салмақтағы UFC-дің бұрынғы чемпионы Ронда Роузи актерлік мансабын жалғастыруда. NBC телеарнасына берген сұхбатында Роузи «Blindspot» сериалының эпизодына түсетінін мәлімдеді.
Фильмдегі басты кейіпкер денесіне сурет салынған әйел адам болмақ. Сюжет бойынша, ФБР басты кейіпкердің денесіндегі суреттерді көптеген қылмыстық істі анықтаудың кілті деп, әйелдің артына түседі.
Ал Роузи Девон Пенберти атты әйелдің рольін сомдайды. Фильмде Девон қару-жарақ сатқаны үшін түрмеде отырады. Ол Нью-Гемпширдің «ақ таулар» мекенінде дүниеге келген. Пенберти - қатігез, спортқа жақын, күресу әдістерін білетін және қару-жарақты еркін қолданатын әйел. Аталмыш фильмнің премьерасы мамыр айына белгіленген.
Айта кетейік, бұл Роузидің фильмдердегі алғашқы рольі емес. Бұған дейін жекпе-жек шебері «Неудержимые 3», «Форсаж 7», «Entourage» фильмдерінде және Comedy Central-дың «Drunk History» сериялына түскен.
Естеріңізге салайын, 2016 жылдың 30 желтоқсан күні UFC 207 аясында Роузи бразилиялық Аманда Нуньестен бірінші раундта ұтылды. Содан кейін Ронда Роузи октагонға оралатынын ресми мәлімдеген жоқ.
Роузи ММА-гі ең танымал спортшылардың бірі. Оның жекпе-жегінде алаң үнемі толық болады. Мамандардың айтуынша, Роузи нәзік жанды арулардың жекпе-жек спортына қызығушылық танытуына септігін тигізген спортшы.
