Америкалық блогер Джейк Пол Канеломен айқас жоспарлап жүр
Америкалық боксшы әрі блогер Джейк Пол бұрынғы чемпион Сауль «Канело» Альвареспен жекпе-жек өткізу мүмкіндігін қарастырып жатыр, деп хабарлайды Prosports.kz.
Бұған дейін Полдың Джервонта Дэвиске қарсы жекпе-жегі тергеу басталуына байланысты өтпей қалған еді. Енді ол жаңа қарсылас іздеуде — олардың қатарында бұрынғы чемпиондар, бокс ардагерлері және экс-UFC чемпионы Фрэнсис Нганну да бар.
«Менің ойымша, бұл кездесуді жүзеге асыра алатын адам – Түрки. Мен дайынмын, Түрки де қызығушылық танытты. Ең бастысы — Канело жекпе-жекке келісім берді, енді тек оны жүзеге асыру ғана қалды», — деді Пол.
Бұған дейін Альвареспен келіссөздер соңғы кезеңге жетіп, келісімшарттар дайындала бастаған болатын. Алайда Сауд Арабиясының спорт жетекшісі Түрки әл аш-Шейх Альвареске Терренс Кроуфордқа қарсы айқас үшін жоғары сыйақы ұсынғаннан кейін кездесу кейінге қалдырылды.
Джейк Полдың рингке қайта оралуы желтоқсан айынан ерте болмайды. Егер жаңа қарсылас табылмаса, жекпе-жек 2026 жылға шегерілуі мүмкін.