«Ордабасы» келесі матчта жеңіске жетпесе бас бапкерді қызметінен босатуы мүмкін
Қазақстандық бапкер Болат Есмағамбетов «Ордабасының» маусым басындағы сәтсіздігі жайлы пікірін айтып, тығырықтан шығу жолдарына қатысты ойын ортаға салды, деп хабарлайды Prosports.kz.
«Ордабасы шабуыл өтінде гол соғудан үлкен мәселелерге тап болды. Бұл ең алдымен бас бапкерге қойылатын сұрақ. Проблемаларды дереу шешу керек. ҚПЛ-де үш ойын голсыз өткізу деген сұмдық. Футболшылардың өзара түсінісіп ойнауына қажетті уақыты әлдеқашан өтіп кеткен. Меніңше, алдағы ойындарда «Ордабасы» жеңіске жете алмаса, бас бапкерді орнынан алу мәселесі нақты көтерілетін сыңайлы. Бұдан басқа амалын көріп тұрған жоқпын», - деді отандық маман.
«Ордабасы» ҚПЛ-2025 турнирінің үш турынан кейін соңғы, 14-орында келеді. Шымкенттік команда үш матчта бірде-бір гол сала алмай, 2 ұпай ғана еншілеген.
Шымкенттік клуб 5-сәуірде төртінші тур аясында сырт алаңда «Астанаға» қонаққа барады. Ал 19-сәуірде талдықорғанның «Жетісуын» өз алаңында қабылдайды.