Елордалық финалда «Астана» жеңімпаз болды
«Астана» – QFL Лига кубогының алғашқы жеңімпазы атанды, деп хабарлайды Prosports.kz
Түркістанда 2024 жылғы QFL Лига кубогының бірінші маусымы аяқталды. Финалдық матчта «Астана» клубы «Жеңісті» 0:2 есебімен жеңді. Ойын «Түркістан Арена» стадионында өтті.
Негізгі уақытта «Астана» клубы үстемдікке ие болғанымен, 90 минутта есеп ашылмай, 0:0 есебімен аяқталды. Кубоктың тағдыры тек овертаймда ғана шешілді. 104-ші минутта Карло Бартолец есеп ашса, 120+1 минутта гвинеялық шабуылшы Усман Камара есепті ұлғайтты.
Еске салсақ, «Астана» QFL Лига кубогындағы жеңісі арқылы өз тарихындағы жүлде санын 17-ге жеткізді. Бұндай жетістікке әзірше өзге отандық клубтар жетпеген. Елордалық ұжым финалға дейін «Каспий» мен «Шахтерді» жеңіп, D тобында көшбасшы болды. Ал жартылай финалда матч соңындағы пенальти сериясы арқылы «Елімайдан» басым түсті. Кубокпен қатар, Григорий Бабаянның шәкірттері 90 миллион теңге сыйақы алса, «Жеңіс» клубы 50 миллион теңгеге иелік етті.
Айта кетейік, QFL Лига кубогына еліміздің ең мықты 16 клубы қатысып, бәсеке 25 мамыр мен 23 қараша аралығында жалғасты. Турнирдің жүлде қоры рекордтық 1 миллион долларды құрады, ал басты серіктесі - 1XBET компаниясы.