Бішкекте өтіп жатқан Азия чемпионатында Қазақстан екінші алтынды жеңіп алды

Бүгін Қырғызстан астанасы Бішкек қаласында күрес түрлерінен Азия чемпионаты аясында грек-рим күресінен жарыс өтіп жатыр, деп хабарлайды Prosports.kz

Қазақстандық Ержет Жарылқасын 63 келі салмақта финалда өнер көрсетті. 2021 және 2022 жылдардағы Азия чемпионатының қола жүлдегері жапониялық Аята Сузукиге қарсы жекпе-жекте Ержет жеңіске жетті.

Осылайша, спортшы ел қоржынына екінші алтынды әкелді. Алғашқы алтынды еркін күресші Азамат Дәулетбеков жеңіп алды.

Айта кетейік, Жарылқасын жартылай финалда солтүстік кореялық Чанди Кимді 5:3 есебімен жеңген болатын.