Түркістандық шабандоздар көкпардан ел чемпионы атанды

<span>Көкпардан жастар арасында апта бойы жалғасқан Қазақстан чемпионатында Түркістан облысының «Құлагер» командасы бас жүлдеге ие болды, деп хабарлайды Prosports.kz сайты ҚазАқпарат-қа сілтеме жасап. </span>

<span>Сонымен қатар, ұлттық спорт түрлері аударыспақ, жамбы ату жəне теңге ілуден өткен елішілік жарыстардың жеңімпаздары мен жүлдегерлері де анықталды. </span>

<span>Кілең мықты жігіттер бақ сынасқан көкпар додасына елімізден 9 команда қатысты. Биыл 15-рет жалауы желбіреген шабандоздар сайысының ақтық сынында Түркістан облысының командасы Жамбыл облысынан келген «Әулиеата» көкпаршыларын 6:2 есеппен ойсырата жеңді. </span>

<span>Жамбыл облысының көкпаршылары - күміс жүлдегер, Алматы қаласының құрамасы - қола жүлдегер атанды. </span>

<span>Сонымен қатар, ұлттық спорт түрлерін жаңғырту мақсатында аударыспақ, теңге ілу жəне жамбы атудан да биылғы Қазақстан чемпионатының жеңімпаздары анықталды. </span>

<span>Апта бойына жалғасқан жарыста білекті де қайсар жігіттер арасында аударыспақтан 4 салмақта түркістандықтар жеңімпаз атанды. </span>

<span>Мәселен, 70 келіде жеңістің тұғырынан түркістандық Дарын Өткелбай көрінсе, 80 келіде Расул Құрайыш, +80 келі салмақта Ғабит Ағабектің бағы жанды. Теңге ілуден Ғалымжан Изжановтың мерейі үстем болды. </span>

<span>Ал, жамбы ату жарысында Жамбыл облысының саңлағы Бақдəулет Бабажан жеңімпаз атанды. Түркістандықтар Батыр Бексауыт - күміс алқа, Ералхан Айкөз - қола жүлдені қанағат етті. Жарыс соңында жеңімпаздар мен жүлдегерлер арнайы дипломмен марапатталды. </span>

<span>Сондай-ақ, аударыспақтан «Үздік спортшы» атанған Расул Құрайыш пен көкпардан «Үздік салымшы» номинациясына ие болған Сабыр Бақдаулетке грамоталар табыс етілді.</span>

<span> Ал, жанкүйерлерді өзінің талантымен таң қалдырған Намыскөк атты сәйгүлік «Үздік ат» атанды.</span>