Жансая Әбдімәлік әлем чемпионатындағы басты қарсыластарын атады

<span>Қазақстанның намысын қорғайтын қыздар құрамасының көшбасшысы Жансая Әбдімәлік Астанада шахматтан басталатын командалық әлем чемпионатындағы басты қарсыластарын атады, деп хабарлайды Prosports.kz сайты ҚазАқпаратқа сілтеме жасап. </span>

<span>«Біздің басты қарсыластарымыз - Украина, Қытай және Ресей деп есептеймін. Қалған қарсыластарымызбен өтетін ойында мүмкіндіктеріміз жақсы. Ең бастысы, бәріміз жұдырықтай жұмылып ойнайтын болсақ, сәттілік бізде болмақ», - деді Жансая Әбдімәлік Астанада өткен баспасөз мәслихатында. </span>

<span>Қазақстан шахмат федерациясының вице-президенті Жандос Әбішевтің айтуына қарағанда, ерлер мен қыздар командасының айтарлықтай мүмкіндіктері бар. «Егер қыздарымыз бар күш-жігерін салып, шығармашылық нәтиже көрсететін болса, мұның өзі айтарлықтай жетістік. Қыздар құрамасы үшін бестікке ену - үздік нәтиже болар еді. Ерлер құрамасы қазіргі уақытта тоғызыншы орында тұрғанын ескерсек, 7, 8 немесе 9-шы орын ерлер үшін жақсы нәтиже болады», - дейді Жандос Әбішев. </span>

<span>Еске сала кетсек, шахматтан командалық әлем чемпионаты алғаш рет Қазақстанда өткелі отыр. Бүгін Астанада жарыстың салтанатты ашылу рәсімі өтпек. Алғашқы кезең ойындары ертең, наурыздың 5-і күні басталады. </span>

<span>Қазақстан құрамасы сапында Жансая Әбдімәлік, Динара Сәдуақасова, Бибісара Асаубаева, Гүлісхан Нахбаева, Гүлмира Дәулетова, Ринат Жұмабаев, Муртас Қажғалиев, Әнуар Исмағамбетов, Денис Махнев пен Петр Костенколар өнер көрсетеді.</span>

Фото The Steppe