QJ League жаңа маусымының баспасөз конференциясы өтті
Бүгін, 6 сәуір күні Астана қаласында Freedom QJ League төртінші маусымының басталуына арналған баспасөз конференциясы өтті, деп хабарлайды Prosports.kz.
Іс-шарада Тимур Турлов, Александр Кеплин және Рохус Шох сөз сөйлеп, лиганың үш жылдағы жетістіктері мен алдағы жоспарларын таныстырды. Осы уақыт ішінде лига 3 мыңнан астам жас футболшыны қамтып, 997 матч өткізген, олардың барлығы дерлік тікелей эфирде көрсетілген. Жалпы қаралым саны 3,5 миллионға жуықтады.
Лига жасөспірімдер футболына кәсіби деңгейге жақын жағдай жасап, командаларға толыққанды логистика, жаттығу үдерісіне цифрлық шешімдер мен «ақылды камераларды» енгізіп келеді. Сонымен қатар жаттықтырушыларға арналған білім беру бағдарламалары жүзеге асырылуда.
2026 жылғы маусым 18 сәуірде басталады. Осы күні Қызылордада «Қайсар» мен «Тобыл» арасында лига тарихындағы мыңыншы матч өтеді.
Жаңа маусымда алғаш рет U-15 санаты қосылып, U-16, U-17 және U-18 жас ерекшеліктеріндегі командалар да жарысты жалғастырады. Жалпы алғанда, Қазақстанның 18 өңірінен шамамен 2000 жасөспірім қатысады.