Чеферин Италия құрамасының сәтсіздігіне қатысты пікір айтты
УЕФА президенті Александер Чеферин Италия құрамасының Босния және Герцеговинаға қарсы матчтағы сәтсіздігі туралы пікір білдірді, деп хабарлайды Prosports.kz.
Оның айтуынша, мұндай жағдайда федерация басшысын кінәлау дұрыс емес. Чеферин бапкер мен ойыншылардың жауапкершілігін атап өтіп, сырттан сын айтуды орынсыз деп бағалады.
«Жеңсе — бапкер мен ойыншылар батыр болады, жеңілсе — жауапкершілік бәрімізге ортақ. Бұл Габриэле Гравинаның кінәсі емес. Италиядағы басты мәселе — футбол инфрақұрылымының әлсіздігі», — деді Чеферин.
Сонымен қатар ол 2032 жылғы Еуропа чемпионатына дайындық мәселесіне де тоқталды. Оның сөзінше, егер қажетті инфрақұрылым дайын болмаса, турнир Италияда өтпеуі мүмкін.
Чеферин Италия футболының қайтадан жоғары деңгейге оралуына сенім білдіріп, негізгі мәселе саясат пен футбол арасындағы үйлесімнің жоқтығында екенін атап өтті.