Қазақстан WADA-мен ынтымақтастықты нығайтып жатыр
Қазақстан Республикасының Туризм және спорт министрлігі Дүниежүзілік допингке қарсы агенттікпен (WADA) өзара түсіністік туралы меморандумға қол қойды, деп хабарлайды Prosports.kz сайты Sports24.kz-ке сілтеме жасап.
Қол қою рәсімі 22 наурыз күні Польшаның Торунь қаласында өткен жеңіл атлетикадан жабық кешендегі әлем чемпионаты аясында министр Ербол Мырзабосынов пен WADA президенті Витольд Банька арасындағы кездесуде өтті. Құжат елдің таза спорт қағидаттарына адалдығын растайды және Мемлекет басшысының халықаралық ынтымақтастықты дамыту мен допингке қарсы саясатты күшейту жөніндегі тапсырмаларын жүзеге асырудағы маңызды қадамдардың бірі болып табылады.
«Өткен жылы Астанаға сапарымыз барысында Мемлекет басшысы көрсеткен жылы қабылдау WADA мен Қазақстан арасындағы ынтымақтастықтың дамуына тың серпін берді. Президент Қасым-Жомарт Тоқаевқа қолдау мен допингке қарсы ғылыми зерттеулер саласына қосқан зор үлесі үшін алғыс айтамын. Бұл келісім Қазақстанның аймақта таза спортты ілгерілетуде жетекші рөл атқара бастағанын айқын көрсетеді», - деп атап өтті Витольд Банька.
Сонымен қатар, тараптар 2027 жылы WADA-ның Атқарушы комитеті мен Құрылтайшылар кеңесінің отырыстарын Астанада өткізу мүмкіндігін талқылады.
Ербол Мырзабосынов Қазақстанның адал бәсекелестік қағидаларына тұрақты түрде берік екенін және допингке қарсы білім беру жүйесін белсенді дамытып жатқанын атап өтті.
«WADA-мен ынтымақтастық біз үшін стратегиялық мәнге ие. Қазақстанда адал спорт мәдениетін дамытуға, халықаралық стандарттарды нығайтуға және әлемдік үздік тәжірибелерді енгізуге басымдық беріледі. Қазақстан тек қолдап қана қоймай, допингке қарсы алдын алу және білім беру бағдарламаларын белсенді түрде жүзеге асыруда», - деді министр.
Бұл кездесудің аясында салалық білім беру және ғылыми инфрақұрылымды дамыту ерекше маңызға ие. Қазақ ұлттық спорт университеті – мамандар даярлауға және білім алмасуға арналған алаң ретінде қарастырылып, Қазақстанның Орталық Азиядағы допингке қарсы саясат бойынша көшбасшылықты дамытудағы білім беру хабы ретіндегі рөлін нығайтуға ықпал етеді.
Айта кетейік, өткен жылы Мемлекет басшысы WADA президенті Витольд Баньканы қабылдаған болатын. Ол Қазақстанға келген алғашқы агенттік президенті атанды. Қабылдау барысында Мемлекет басшысы Витольд Баньканы II дәрежелі «Достық» орденімен марапаттады. Биылғы меморандум ынтымақтастықты жүйелі түрде дамытуға бағытталғанын айғақтайды.