Гвардиола «Реалдан» жеңіліс пен турнирден кетуге қатысты ойын айтт
«Манчестер Сити» Чемпиондар лигасының 1/8 финалында мадридтік «Реалға» есе жіберіп, турнирден шығып қалды, деп хабарлайды Prosports.kz.
Жауапты матчта ағылшын клубы 1:2 есебімен жеңілді, ал екі ойынның қорытындысы бойынша жалпы есеп 1:5 болды. Осылайша «қалалықтар» жарысты ерте аяқтады.
Матчтан кейін бас бапкер Хосеп Гвардиола ойынға баға берді. Оның айтуынша, команда тең құрамда ойнай алмағаны нәтижеге әсер еткен. Сонымен қатар ол өз командасының деңгейін жоғары бағалап, қарсыласын жеңісімен құттықтады.
«Өкініштісі, біз тең құрамда ойнай алмадық, бірақ бұл төрешінің шешімі. Бізде керемет команда бар. Өте жоғары деңгей. Чемпиондар лигасынан шығып қалдық, бірақ мұнда талап та өте жоғары. Карьера әртүрлі нәтижелерден тұрады. «Реалды» құттықтаймын, келесі маусымда тағы кездесеміз деп ойлаймын», — деді Гвардиола.
Айта кетейік, Чемпиондар лигасынан шыққанына қарамастан, «Манчестер Сити» жақын күндері трофей жеңіп алуы мүмкін. 22 наурызда команда Англия Лига кубогының финалында «Арсеналмен» кездеседі.