«XDS Astana Team» Бельгиядағы беделді жарысқа қатысты
«XDS Astana Team» командасының шабандоздары Бельгияда өткен біркүндік «Omloop Nieuwsblad» веложарысына қатысты, деп хабарлайды prosports.kz.
Ұзындығы 207,2 шақырымға созылған беделді бәсекеде «Alpecin-Premier Tech» командасының өкілі Маттье ван дер Пул жеңімпаз атанды. Ол қашықтықты 4 сағат 53 минут 55 секундта жүріп өтті. Екінші орынды «Red Bull-BORA-hansgrohe» сапындағы Тим ван Дейке иеленіп, жеңімпаздан 22 секундқа қалып қойды. Үшінші болып «UAE Team Emirates-XRG» командасының велошабандозы Флориан Вермеерш мәреге жетті, оның уақыты жеңімпаздан 24 секундқа баяу болды.
Қазақстандық ұжым сапында ең үздік нәтижені Майк Тёниссен көрсетті. Ол 26-орын алып, жеңімпаздан 1 минут 55 секундқа артта қалды. Давиде Баллерини 41-болып келді, оның көрсеткіші — 2 минут 2 секунд айырмашылық.
Альберто Беттиол жарысты 100-орында аяқтады. Аарон Гейт 121-орынға, Алессандро Ромеле 125-орынға тұрақтады. Үшеуі де тоғыз минуттан астам уақытқа қалып қойды. Ал Лев Гонов пен Арьен Ливинс жарысты аяқтай алмады.