Қазақстандық теннисші Үндістандағы турнирдің екінші айналымына өтті
Қазақстандық теннисші, әлемнің 292-ракеткасы Бейбіт Жұқаев Нью-Дели (Үндістан) челленджер турнирінің екінші айналымына шықты, деп хабарлайды Prosports.kz тілшісі ҚазАқпаратқа сілтеме жасап.
Қазақстандық теннисші алғашқы айналымда әлемнің 134-інші, аталмыш жарыстың 1-ракеткасы, аустралиялық Дэйн Суиниге тап келді.
Осыған дейін қарсыластар бір рет кездесіп, онда Жұқаев ұтқан еді.
Бірінші партия тай-брейкте аустралиялық спортшының пайдасына шешілді – 7:6 (8:6).
Бұдан кейін Бейбіт камбэк жасай білді – 6:2, 6:2.
Екі сағат 17 минутқа созылған тартысты бәсекеде Б.Жұқаев 15 эйспен бірге 11 брейк-пойнттың төртеуін пайдаланды. Суини 6 эйс жасағанымен, 9 брейк-пойнттан түк шығара алған жоқ.
Сөйтіп сенсациялық жеңіске қол жеткізген Бейбіт Жұқаев ширек финалға шығу үшін әлемнің 275-ракеткасы, грекиялық Стефанос Сакелларидиспен таласады.
Тағы бір қазақстандық, әлемнің 362-ракеткасы Денис Евсеев алғашқы айналымда рейтингіде 468-орындағы италиялық Александр Биндаға есе жіберді – 7:6 (9:7), 1:6, 2:6. Бұл матч та тартысты өтіп, 2 сағат 20 минутта тәмамдалды.
Қазақстандық теннисші Үндістандағы турнирдің негізгі кезеңіне шықты
Қазақстандық теннисші ATP рейтингінде бес орын жоғары көтерілді
Қазақстандық теннисші әлемдік рейтингте тарихи жетістік тіркеді