Қазақстандық теннисші Australian Open-тегі жеңісінен кейін эмоциясымен бөлісті
Қазақстандық теннисші Елена Рыбакина Australian Open турниріндегі тарихи жеңістен кейін жанкүйерлеріне алғыс айтты, деп хабарлайды Prosports.kz. Ол Мельбурнде өткен турнирде жеңіп алған титулына қатысты әсерімен бөлісті.
— Сәлем баршаңызға, ең алдымен қолдауларыңыз үшін үлкен рақмет айтқым келеді. Бүгін Мельбурнде осы керемет трофеймен бірге тамаша таң атты. Осы екі апта бойы көрсеткен қолдауларыңыз үшін көп рақмет — мен сіздердің ықыластарыңызды сездім, ол соңына дейін күресуге маған үлкен күш берді. Мен өте бақыттымын және келесі жылы мұнда қайта оралуды асыға күтемін, — деді Рыбакина Australian Open баспасөз қызметі жариялаған видеода.
Australian Open–2026 турнирінің финалында 26 жастағы қазақстандық теннисші әлемнің бірінші ракеткасы, Беларусь өкілі Арина Соболенканы 6:4, 4:6, 6:4 есебімен жеңді. Бұл жеңіс Елена Рыбакина үшін мансабындағы екінші «Үлкен дулыға» титулы болды. Бұған дейін ол 2022 жылы Уимблдон турнирінде чемпион атанған.