Геннадий Головкин күрес федерациясының президенті Еркін Оқасовпен кездесті
Қазақстан Ұлттық Олимпиадалық комитетінің президенті Геннадий Головкин еліміздің грек-рим, еркін және әйелдер күресі федерациясының президенті Еркін Оқасовпен кездесті, деп хабарлайды Prosports.kz.
Кездесу барысында Геннадий Головкин Еркін Оқасовқа ҚР ҰОК-тің мойындау сертификатын табыстады.
Тараптар жаңа олимпиадалық цикл аясындағы ынтымақтастықтың негізгі бағыттарын талқылады. Атап айтқанда, Біріккен күрес әлемі (UWW) ұйымымен өзара іс-қимыл, Қазақстанда халықаралық турнирлер өткізу перспективалары, сондай-ақ отандық күрестің халықаралық аренадағы орнын нығайтуға бағытталған бірлескен бастамаларды айқындау мәселелері қаралды.
ҚР ҰОК президенті Геннадий Головкин Ұлттық Олимпиадалық комитет пен Федерация арасындағы үйлесімді жұмыстың маңыздылығын атап өтті. Оның айтуынша, Қазақстандағы күрес түрлері ең көп бұқараны қамтитын әрі кең сұранысқа ие спорт түрлерінің қатарына жатады. Бұл еліміздің әлемдік спорт қауымдастығындағы орнын одан әрі нығайтуға берік негіз қалайды.
Федерация басшысы Еркін Оқасов Қазақстан Ұлттық Олимпиадалық комитетімен өзара ықпалдастықтың маңызын ерекше атап өтті. Әсіресе, алдағы жазғы Азия ойындары мен 2028 жылы Лос-Анджелесте өтетін Олимпиада ойындарына дайындық кезеңінде бұл ынтымақтастықтың мәні зор екенін жеткізді.
Сонымен қатар ол бірлескен жұмысты кеңейтуге дайын екенін білдіріп, отандық күресті кеңінен насихаттауға және оның халықаралық аренадағы бәсекеге қабілеттілігін арттыруға бағытталған жаңа бастамалар мен іс-шараларды жүзеге асыруға ниетті екенін айтты.
Сондай-ақ серіктестік байланыстарды кеңейту мен ҚР ҰОК пен Федерация арасындағы бірлескен жұмыстың тиімділігін арттыруға ерекше назар аударылды. Ұйымдастыру үдерістерін жетілдіруге, Қазақстанның маңызды халықаралық спорттық іс-шараларға қатысу аясын кеңейтуге және елдің жаһандық спорт кеңістігіндегі рөлін күшейтуге бағытталған жобаларды жүзеге асыру мүмкіндіктері талқыланды.
Кездесу соңында тараптар екіжақты ынтымақтастықты жалғастырып, ортақ бастамаларды іске асыру жолында өзара ықпалдастықты тереңдетуге дайын екенін растады.
Qazaq Kuresi Ассоциациясына жаңа директор тағайындалды