Майкл Веккьоне: Қазақстандағы өмір бізге ұнап жүр
Америкалық хоккейші, «Барыс» клубының шабуылшысы Майкл Веккьоне Қазақстандағы өмірі туралы ойымен бөлісті, деп хабарлайды Prosports.kz. Оның айтуынша, өзі де, жары да Астанадағы тұрмысқа тез үйреніп кеткен.
Веккьоненің сөзінше, қыс мезгілі оңай болмағанымен, жергілікті халықтың ашық мінезі, дәмді асханалар мен әдемі орындар бұл әсерді толықтырған. Олар қалада серуендеп, сауда орталықтарына барып, Астананы жақынырақ танып жүр. Жанкүйерлердің қолдауы да ерекше екенін атап өтті. Үйдегі ойындар сәтсіз өткен күндердің өзінде көрермендер аренаны толтырып, команданы соңына дейін қолдайды. Осындай атмосферада ойнау үлкен мотивация береді дейді ол.
Хоккейші Алматыға да барып үлгергенін айтты. Бұл командадағы жалғыз үзіліс болғандықтан, сапар ерекше есте қалған. Тауға шығып, қала орталығында серуендеген. Уақыт аз болғанымен, басқа қаланы көріп, әсер алу өзіне және отбасына жақсы демалыс болғанын жеткізді. Егер мүмкіндік болса, Қазақстанның өзге қалаларын да көргісі келетінін жасырмады, бірақ қазір негізгі назар плей-офф үшін күреске аударылған.
Қай қала жайлырақ деген сұраққа Веккьоне нақты бірін бөліп жармады. Оның айтуынша, Астана қалалық тұрғыда ыңғайлырақ көрінсе, Алматыдағы таулар ерекше әсер сыйлайды. Сол қысқа сапар олардың күнделікті ырғақтан сәл тынығып алуына жақсы мүмкіндік болған.