Неймар Бразилия клубында 2026 жылға дейін қалады
Бразилияның «Сантос» клубы шабуылшы Неймармен келісімшартты ұзартқанын ресми түрде жариялады, деп хабарлайды Prosports.kz.
Команданың баспасөз қызметінің мәліметінше, жаңа келісім 2026 жылдың соңына дейін есептелген. Бұған дейін футболшының келісімшарты 31 желтоқсанда аяқталған болатын.
Неймар туған «Сантос» клубына 2025 жылдың қаңтарында оралып, бірден негізгі ойыншылардың біріне айналды. 33 жастағы шабуылшы маусымның шешуші матчтарында ерекше көзге түсіп, алған жарақатына қарамастан, команданың Бразилия Серия А-да қалуына айтарлықтай үлес қосты.
Маусым аяқталғаннан кейін Неймар тізесіне ота жасатты. Қалпына келу мерзімі әзірге нақтыланған жоқ, алайда келісімшарттың ұзартылуы клубтың футболшыға алдағы маусымдарда да сенім артатынын көрсетеді.