Украиналық боксшы Александр Усик келесі қарсыласы кім болуы мүмкін екенін айтты, деп хабарлайды Prosports.kz. Ол келесі жылы рингке қайта оралатынын және «Қола бомбардирмен» жұдырықтасқысы келетінін жеткізді.
«Қола бомбардир» — америкалық боксшы Деонтей Уайлдердің лақап аты. Бұл атау оған 2008 жылғы Олимпиада ойындарында қола жүлде алғаннан кейін берілген.
Уайлдердің кәсіпқой мансабындағы көрсеткіші — 44 жеңіс, 4 жеңіліс және 1 тең нәтиже. Алайда ол соңғы алты жекпе-жегінің төртеуінде қарсыластарына жол берген.
Ал Усик 2025 жылы Дэниел Дюбуаны жеңіп, ауыр салмақта абсолютті әлем чемпионы атағын қайта иеленді. Кейін ол Фабио Уордлиге қарсы жекпе-жектен бас тартуына байланысты чемпиондық белбеулерінің бірінен айырылды.