Қазақстан құрамасының шабуылшысына Ресейдің екі клубы қызығушылық танытты
«Локомотив» пен «Ахмат» Қазақстан құрамасы мен «Елімайдың» 22 жастағы шеткері шабуылшысы Ғалымжан Кенжебекті қатарға қосуды талқылап жатыр, деп хабарлайды Prosports.kz. Журналист Иван Карпов таратқан мәліметті «Чемпионат» дереккөздері де растаған.
Карповтың айтуынша, Кенжебекті бұған дейін «Краснодар» мен «СКА-Хабаровск» қараған, ал биыл оған «Акрон» қызығушылық білдірген. «Ахмат» жас шабуылшыны Лечи Садулаевтың орнын басатын ойыншы ретінде көріп отыр.
Ғалымжан Кенжебек «Елімайға» 2025 жылдың жазында қосылған. Содан бері чемпионаттағы 11 ойында алты гол соғып, төрт нәтижелі пас берген. Transfermarkt порталы футболшының бағасын 600 мың еуро деп көрсетеді.
Ұлттық құрама сапында Кенжебек 10 матч өткізіп, үш гол соқты және бір нәтижелі пас жасады.