«Копенгаген» қақпашы «Қайратқа» қарсы матчтан соң қатаң сынның астында қалды
26 қараша күні Дания астанасында өткен Чемпиондар лигасы 2025/2026 маусымының жалпы кезеңіндегі матчта «Копенгаген» «Қайратты» 3:2 есебімен жеңген еді. Дания чемпионы кездесудің соңына дейін 3:0 есебімен алда болғанымен, матч соңында екі гол өткізіп алған, деп еске салады Prosports.kz.
Қазақстаннан барған қонақтар есепті 81-минутта қысқартты. Бұл голға «Копенгаген» қақпашысы, Хорватия ұлттық құрамасының голкипері Доминик Котарскидің өрескел қателігі себеп болды. Ол өз айып алаңының алдында допты ұзақ ұстап, қарсыласты алдауға тырысқан кезде допты жоғалтып алды. Осыдан кейін Дастан Сәтпаев бос қақпаға дәл соққы жасап, есепті 1:3 етті.
Бұдан кейін Котарски тағы бір гол жіберіп алды: 90-минутта Олжас Байбек есепті 2:3 қылды. Бұл соққыға хорват қақпашысы ештеңе істей алмады.
Матчтан кейін Котарски жанкүйерлер мен сарапшылар тарапынан қатты сынның астында қалды. Солардың бірі, Дания құрамасының бұрынғы ойыншысы Томас Гравесен дат телеарнасындағы тікелей эфир кезінде қақпашыны аса қатал сынға алды.
«Біз саусақпен көрсете алатын бір ғана ойыншы бар. Ол клубтағы барлық нәрсені бұзып жатыр, оның ешқандай құрметі жоқ. Оны біржола сатып жіберіңдер! Қазір болып жатқанның бәріне сол кінәлі. Мен ешқашан мұндай нашар қақпашыны көрген емеспін! Ол соншалықты нашар, тіпті сипаттауға келмейді», - деп ашуланды мадридтік «Реалдың» бұрынғы ойыншысы.
«Қайрат» - «Олимпиакос» матчына билеттер сатылымға шықты